7 teknika negozioetan produktiboagoak izateko

Lan esparruan produktiboa izatea gako da arrakasta lortzeko eta nabarmentzeko. Nolanahi ere, eraginkorrak ez diren lan metodoen edo distrakzioen artean harrapatuta gelditzen gara. Horretarako, zazpi teknika eraginkor azalduko ditugu, negozioen produktibitatea hobetzen laguntzeko, denborari etekinik gehiena ateratzeko eta helburu profesionalak erraztasun handiagoz lortu ahal izateko.

1. Bi minutuen araua

Arau horren arabera, komeni da denbora laburrean (bi minutu edo gutxiagoan) egiten diren zereginak egitea, “horiek gainetik kentzeko”. Zeregin horien artean daude, hala nola mezuak erantzutea, ideia bat idaztea edo bilera bat programatzea. Arau horrek xede du zeregin laburrak pilatzea saihestea, egiteke dauden beste egiteko batzuk arintze aldera. Zeregin horiek egiteko bi minutu baino gehiago behar izatekotan, gomendagarria da horiekin zerrenda bat egitea, lehentasunaren arabera antolatuta.

2. 90/30 teknika

Teknika horren arabera, premiazkoena den zeregina hautatu eta 90 minutuz lan egingo da horren inguruan, ondoren, 30 minutuko atsedenarekin osatzeko.

3. Ivy Lee metodoa

Teknika honen sortzailea Ivy Lee izan zen, 1910ean. Egunero lotara joan aurretik, hurrengo egunean egin beharreko sei zeregin garrantzitsu idatzi behar dira, lehentasunaren arabera antolatuta. Behin lanean, zeregin horiek egin behar dira (distrakzioak saihestu) eta zeregin bat egin ezean ezin da hurrengo(eta)ra igaro. Hori gertatuz gero, egiteke gelditu den zeregina hurrengo eguneko zerrendako lehenengo ataza izango da.

4. Eat the frog

Teknika honek izen bitxia du “jan ezazu igela”. Prokrastinazioari aurre egitera bideratuta dago: zereginik konplexuenak hasieran egitean datza. Lehenik eta behin, lanik neketsuena egin behar da eta, horrela, ondoren egin beharrekoak errezagoa den itxura izango du.

5. Batching

Teknika honen arabera, elkarren artean antzekoak diren zereginak ordu tarte jakinetan banatu behar dira. Esaterako, mezu bat bidaltzea eta telefonoz deitzea multzo beraren barruan egongo lirateke, hau da, komunikazioa. Zeregin horiek egunero ordu berean egin daitezke, horrela, egun osoan zehar mugikorraz edota ordenagailuaz arduratuta egotea saihets daiteke.

6. Kanban metodoa

Metodo honen arabera orri bat hiru zutabetan banatu behar da: “egiteke”, “aribidean” eta “eginda”. Egin beharreko ataza guztiak hiru zutabe horietan sailkatu behar dira. Horrela, negozioen lan sistema hobe daiteke.

7. 80/20 araua edo Paretoren printzipioa

Paretoren printzipioari 80/20 araua ere esaten zaio. Teoria honen arabera, kasu askotan, emaitzen % 80a kausen eta ahaleginek % 20tik dator. Printzipio hori negozioetan aplika daiteke eraginkortasuna hobetzeko eta emaitzak maximizatzeko. Adibidez, 80/20 araua aplikatuta, denbora gehiago bidera litzateke gako diren produktuak sustatzera, eskuragarritasuna hobetzera edota ikusgarritasuna areagotzera ere.